АНУ-ын зэвсэгт хүчин дөрөвдүгээр сарын 13-наас эхлэн Ираны эргийн бүсэд далайн тээврийн хөдөлгөөнийг хязгаарлах ажиллагаа эхлүүлэхээр төлөвлөж буй талаар мэдээллээ.

АНУ-ын Зэвсэгт хүчний Төв командлал (CENTCOM)-аас энэ ажиллагааг “далайн бүслэлт” хэмээн тодорхойлж, Ираны боомтуудтай холбоотой хөлөг онгоцны хөдөлгөөнийг хязгаарлах зорилготой гэж мэдэгдсэн байна. Тус ажиллагаа нь Ираны боомтоор орж, гарч буй бүх улсын хөлөг онгоцод хамаарах боломжтойг онцолжээ.

АНУ-ын Ерөнхийлөгч Donald Trump энэ талаар өгсөн ярилцлагадаа Ираны газрын тосны экспортын орлогыг хязгаарлах нь гол зорилго болохыг дурдсан байна. Мөн зарим улс орнууд энэхүү санаачилгыг дэмжих магадлалтайг онцолжээ.

Харин Ираны тал Ормузын хоолой орчим дахь далайн хөдөлгөөнийг өөрийн хяналтад байлгаж байгаа гэж өмнө нь мэдэгдсэн бөгөөд бүс нутгийн аюулгүй байдлыг дотоодын тэнгисийн цэргийн хүчээр хангаж байгаагаа илэрхийлсэн байна.

Үүний зэрэгцээ АНУ, Ираны төлөөлөгчид Пакистанд хийсэн хэлэлцээгээр гал зогсоох, хориг арга хэмжээ, цөмийн хөтөлбөр зэрэг асуудлаар нэгдсэн шийдэлд хүрч чадаагүй талаар эх сурвалжууд мэдээлж байна.

Шинжээчдийн үзэж байгаагаар, хэрэв энэхүү далайн хязгаарлалт бодитоор хэрэгжвэл Ормузын хоолойгоор дамжин тээвэрлэгддэг дэлхийн газрын тосны нийлүүлэлтэд нөлөөлж, эрчим хүчний зах зээлд дарамт үүсгэх эрсдэлтэй байна.